लोकसभा निवडणुकीला पायाखालची वाळू सरकायला लागल्यामुळे देशातील नेते गल्लीतल्या राजकारणात उतरू लागले आहे. असा हल्लाबोल विजयसिंह यांचे धाकटे बंधू जयसिंह मोहिते-पाटील यांनी अकलूज येथे लोकसभा निवडणुकीच्या प्रचारसभेत बोलताना शरद पवार यांच्यावर केला. नातेपुते येथे झालेल्या राष्ट्रवादी काँग्रेसच्या प्रचारसभेत बोलताना शरद पवार यांनी संघाची हाफ चड्डी घालून मांडय़ा दाखवू नका, सहकारमहर्षींना काय वाटेल, अशा शब्दांत मोहिते-पाटील यांच्यावर अतिशय जोरदार टीका केली. या टीकेचा समाचार घेतांना जयसिंह मोहिते-पाटील यांनी शरद पवार यांच्यावर टीका केली होती.
जयसिंह मोहिते-पाटील यांनी पवारांना जोरदार प्रत्युत्तर दिले. पायाखालची वाळू सरकली की माणसाचा तोल जातो, वय समजत नाही. कोणत्या पदावर आहे हे समजत नाही. महाराष्ट्रात राष्ट्रवादीची फक्त एक जागा जिंकून येईल असे ते म्हणाले. विजयदादांना यंदा माढय़ाचे तिकीट पक्के असताना उंदरासारखे खेळवायला या नेत्याने सुरुवात केल्यावर आता या मांजरालाच पकडू अशी भूमिका घेतल्याने लंगोट लावलेले पळून गेले. यावेळी तुमच्या मांडय़ाही सगळय़ांना पाहायला मिळाल्या असत्या, मात्र तुम्ही पळून गेलात अशी टीका त्यांनी केली. त्यामुळे लोकसभा निवडणुकीच्या निकाला नंतर येणाऱ्या विधानसभा निवडणुकीला पवार आणि मोहिते-पाटील यांच्या परिवारात वाद होण्याचे चिन्ह नाकारता येणार नाही.
