सूत्रांनी दिलेल्या माहितीनुसार, मूळच्या कर्नाटकच्या असणाऱ्या कस्तुरी माने सिंहगड रस्त्यावरील हिंगणे भागात भाडयाने प्लॅट घेऊन आपल्या दोन मुलांसह राहत होत्या. त्या महिलांसाठी ड्रायव्हिंग क्लास घेत असत. आरोपी रवींद्रने मयत कस्तुरी यांच्याकडून वेळोवेळी हातउसने म्हणून आत्तापर्यंत पंधरा लाख रुपये घेतले होते. माने यांच्या मुलीचे लग्न असल्याने त्यांनी आरोपीकडे पैशाची मागणी केली, यावरून दोघांत सतत वाद झाल्याने आरोपीने गळा आवळून त्यांचा खून करून फरार झाला होता.
सदर आरोपी हा शिर्डी येथील साईधाम आश्रमात असल्याची माहिती मिळताच सिंहगड रस्ता पोलीस ठाणेचे सहायक पोलीस निरीक्षक सतीश उमरे, तसेच पोलीस शिपाई किशोर शिंदे, बालाजी जाधव, दत्ता सोनवणे , रफिक नदाफ, अविनाश कोंडे यांनी शिर्डी पोलिसांच्या मदतीने आरोपीला सोमवारी पहाटे पाच वाजता ताब्यात घेतले असून त्यास न्यायालयात हजर करण्यात येणार असल्याची माहिती सिंहगड पोलिसांनी दिली.
