जागा वाटपावरून काँग्रेस-राष्ट्रवादी मध्ये मतभेद…..

लोकसभा निवडणुकीला दारुण पराभव झाल्यावर सुद्धा काँग्रेस पक्षाने येणारी विधानसभा राष्ट्रवादीला सोबत घेऊन लढण्याचे ठरविले आहे. या निर्णयाला काँग्रेसच्या अनेक नेत्यांनी विरोध दर्शविला असताना आता काँग्रेस आणि राष्ट्रवादी मध्ये जागावाटपा वरून बिवचले आहे.

विधानसभा निवडणुकीला आता फक्त काही महिने शिल्लक आहेत. त्यातच काँग्रेस-राष्ट्रवादीचे जागावाटपासाठी चर्चेचं गुऱ्हाळ सुरू आहे. या चर्चेत मुंबईतल्या जागांववरून दोन्ही पक्षांमध्ये तीव्र मतभेद झाल्याची माहिती पुढे येत आहे. मुंबईत जागावाटप समसमान पातळीवर व्हावे असे राष्ट्रवादीचे मुंबईचे अध्यक्ष सचिन अहीर यांनी म्हटलंय. तर राष्ट्रवादीची मुंबईत ताकदच नाही तर अर्ध्या जागा द्यायच्या कशा असा सवाल काँग्रेसने उपस्थित केला आहे.

लोकसभा निवडणुकीतल्या पराभवानंतरही दोन्ही पक्ष काहीच धडा शिकले नाहीत असेच म्हटले जात होते. भाजप आणि सेनेसारख्या मजबूत पक्षांशी मुकाबला करण्यासाठी एकत्र येवून लढू अशी घोषणा दोन्ही पक्षांनी केला होती. मात्र जागा वाटपाच्या चर्चेत घोळ घातला जातोय अशी दोन्ही पक्षांच्या नेत्यांची तक्रार आहे.

या चर्चेत वेळ जातो आणि मग तयारीसाठी जास्त दिवस मिळत नाही असे या नेत्यांचे म्हणणं आहे. अंतिम जागा वाटप एनसीपी आणि काँग्रेस पक्षश्रेष्ठी करतील असे म्हटले जात असलं तरी राष्ट्रवादीला अर्ध्या जागा द्यायला मात्र काँग्रेसची सकारात्मक भूमिका नाही अशी माहिती सूत्रांनी दिली आहे.