आगामी पश्चिम बंगालमध्ये होणाऱ्या विधानसभा निवडणुकीला शिवसेना पक्ष उतरणार की नाही अशी चर्चा राजकीय वर्तुळात रंगताना दिसत होती. मात्र शिवसेना पश्चिम बंगालची विधानसभा निवडणूक लढवणार आहे. शिवसेना नेते आणि खासदार संजय राऊत यांनी ट्विट करुन यासंदर्भातली घोषणा केली आहे.
शिवसेना पक्षप्रमुख आणि महाराष्ट्राचे मुख्यमंत्री उद्धव ठाकरे यांच्याशी चर्चा केल्यानंतर आम्ही पश्चिम बंगालची विधानसभा निवडणूक लढवण्याचा निर्णय घेतला आहे असं संजय राऊत यांनी जाहीर केलं आहे. ममता बॅनर्जींचा तृणमूल काँग्रेस हा पक्ष विरुद्ध भाजप अशी दुरंगी लढत या निवडणुकीत पाहण्यास मिळते आहे.
आता या निवडणुकीत शिवसेनेनेही उडी घेतली आहे. त्यामुळे पुढे काय काय घडणार हे पाहणं नक्कीच महत्त्वाचे ठरणार आहे. शिवसेनेने किती जागा लढवणार? उमेदवार कोण असतील हे अद्याप जाहीर केलेले नाही. मात्र पश्चिम बंगालची विधानसभा निवडणूक शिवसेना लढवणार असल्याचं स्पष्ट केले आहे. त्यामुळे भाजपला या ठिकाणीही शिवसेनेशी ‘सामना’ करावा लागणार असं सध्या तरी दिसतं आहे.
So, here is the much awaited update.
After discussions with Party Chief Shri Uddhav Thackeray, Shivsena has decided to contest the West Bengal Assembly Elections.
We are reaching Kolkata soon…!!
Jai Hind, জয় বাংলা !
— Sanjay Raut (@rautsanjay61) January 17, 2021