शिवसेना साधणार कष्टकरी महिलांशी संवाद

विधानसभा निवडणुकीपूर्वी युवासेनाप्रमुख आदित्य ठाकरे यांचा ‘आदित्य संवाद’ कार्यक्रम जोरात सुरू असतानाच आता शिवसेनेने आणखी एक ‘माऊली संवाद’ उपक्रमाची सुरुवात केली आहे. शिवसेना सचिव आदेश बांदेकर महाराष्ट्रातील शेतकरी, कष्टकरी आणि समाजातील सर्वच घटकांतील महिलांशी ‘माऊली संवाद’च्या माध्यमातून संवाद साधणार आहेत. निवडणुकीत एकुण मतदारांपैकी अर्धी मतदार संख्या ही महिलांची आहे. त्यामुळे या एवढ्या मोठ्या मतदार वर्गाला आकर्षित करण्यासाठी, शिवसेनेनं आदेश बांदेकर यांचा चेहरा महाराष्ट्राच्या निवडणुक मैदानात उतरवलां आहे.

आदेश बांदेकरांचा ‘माऊली संवाद’ या उपक्रमाची सुरवात पालघर जिल्ह्यातील विक्रमगड या आदिवासी बहूल तालुक्यातून होणार आहे. पहिल्या टप्प्यात बांदेकर हे दोन ऑगस्ट रोजी पालघर येथे तर तीन ऑगस्ट रोजी भिवंडी येथे जाऊन माऊलींसोबत संवाद साधणार आहेत. त्यानंतर चार ऑगस्टला ते बीड येथे आदित्य ठाकरे यांच्या जनआशीर्वाद यात्रेत सहभागी होणार आहेत अशी माहिती शिवसेना मध्यवर्ती कार्यालयातून प्रसिद्धीस दिलेल्या पत्रकात नमूद केली आहे.