मुंबई पोलिस होणार अधिक गतिमान…!
पोलिस विभागाला अधिक गतिमान करणाऱ्या उपयुक्त अशा सेगवे चे म्हणजेच सेल्फ बॅलन्सिंग इलेक्ट्रिक स्कूटरचे उद्घाटन गृहमंत्री अनिल देशमुख यांच्या हस्ते मरिन ड्राईव्ह येथे संपन्न झाले. यावेळी रोहित पवार, मुंबईचे पोलिस आयुक्त परमवीर सिंग, सह पोलिस आयुक्त विनय कुमार चौबे, सह पोलिस आयुक्त दक्षिण विभाग निशिथ मिश्रा तसेच इतर वरिष्ठ अधिकारी उपस्थित होते.
महाराष्ट्राचे पोलिस दल हे जागतिक पोलिसिंग स्टॅंडर्ड नुसार अत्याधुनिक व सुसज्ज अशा साधन सामग्रीने भक्कम करण्याचे महाराष्ट्र शासनाने ठरविले आहे. त्यानुसार या सेग वे चे उद्घाटन करण्यात आले असल्याची माहिती अनिल देशमुख यांनी यावेळी दिली. सध्या लॉकडाऊनच्या काळात अशा प्रकारची यंत्रणा पोलिसांसाठी उपयुक्त ठरेल, असा विश्वास त्यांनी यावेळी व्यक्त केला. पोलिसांच्या मास्कला माईक लावण्यात येणार असून, ते त्याद्वारे लोकांना गर्दीच्या ठिकाणी सुरक्षितते संदर्भात सूचना देऊ शकतील. तसेच त्यांच्या मदतीला पब्लिक अड्रेस सिस्टीम असलेले अत्याधुनिक ड्रोन देखील आहेत. त्याचाही उपयोग होऊ शकेल, असे अनिल देशमुख म्हणाले.
