गेले दोन दिवस पडणार्‍या पावसाने अनेक गावांत-शहरांत पूर आला आहे. शहरात अनेक नव्या वसाहतीत पाणी साचल्याने बर्‍याचजणांना एका अनपेक्षित संकटाला सामोरे जावे लागते आहे. हे संकट म्हणजे अगदी ‘सेफ पार्कींग लॉट’ किंवा ‘ओपन गॅरेज’ मध्ये उभ्या असलेल्या गाड्या पाण्यात बुडाल्या आहेत. या सर्व गाडी मालकांच्या समोर एक मोठा प्रश्न आ वासून उभा आहे तो म्हणजे या नुकसानीची भरपाई इन्श्युरन्स कंपनी देणार का ?
जर तुमची गाडी नविन असेल तर तुमच्या गाडीची जोखीम सर्वसमावेशक म्हणजे ‘काँप्रेहेन्सीव्ह रिस्क कव्हर’ इन्श्युरन्स कंपनीने घेतलेली असेल. जर कर्ज घेऊन गाडी घेतलेली असेल तर गाडीचा इन्श्युरन्स ”काँप्रेहेन्सीव्ह’ असेल याची खात्री बाळगा. कारण कर्ज देणार्‍या अर्थसंस्थांची ही अनिवार्य अट असते.
पण…. पण … पहिल्या काही वर्षांनंतर केवळ इन्श्युरन्सचा हप्ता (प्रिमियम) कमी भरायच्या हेतूने फक्त ‘थर्ड पार्टी’ इन्श्युरन्स घेतलेला असेल तर पाण्यात बुडालेल्या गाडीचे एकही रुपयाचे नुकसान इन्श्युरन्स कंपनी भरून देणार नाही.
आता समजा, तुमच्या गाडीचा इन्श्युरन्स सर्वसमावेशक आहे तर काय कराल ?
गाडी जागेवरच उभी असेल तर ती तशीच ठेवा. जर वाहून दुसर्‍या जागेवर गेली असेल तर धक्का मारून बाजूला उभी करा. तुमच्या इन्शुरन्स कंपनीच्या हेल्प लाइनवर फोन करून तुमचे नाव -पॉलीसी नंबर आणि गाडीचे लोकेशन कळवा . कंपनीकडून सर्व्हेअर येऊन गाडीचे किती नुकसान झाले आहे, याचा आढावा घेईल. जर जागेवर आढावा घेणे शक्य नसेल तर गाडी टो करून गॅरेजला पाठवली जाईल आणि नुकसानीचा अंदाज कंपनीला कळवून गाडी इन्शुरन्स कंपनीच्या खर्चात दुरुस्त होईल.
आता या सगळ्या धावपळीत एक मोठी घोडचूक तुमच्या हातून होण्याची शक्यता आही ती म्हणजे सर्व्हेअरला बोलावण्याच्या आधीच इग्नीशन मारून गाडी चालवण्याचा प्रयत्न करणे. हे जर तुम्ही केलेत तर गाडीचे इंजिन ‘हायड्रोलॉक’ होईल. हायड्रोलॉक म्हणजे गाडी सुरु होताना इंजिनमध्ये पाणी घुसेल आणि इंजिन ‘सिझ’ होईल. इंजिन ‘सिझ’ झाले की ते कामातून जाईल.
कर्वे रस्त्यावरील वाहतूककोंडी ” मेट्रो” मुळे : पुुणेकर प्रचंड हैराण
इन्श्युरन्स करारानुसार हा गाडी सुरु करण्याचा प्रयत्न आणि त्यातून झालेले इंजिनचे नुकसान ‘कॉन्सिक्वेंशिअल लॉस’ म्हणजे तुमच्या हातून घडलेल्या चुकीमुळे ‘मूळ कारणापेक्षा इतर कारणाने झालेले नुकसान’ या सदरात जाईल. परिणामी इंजिनचा येणारा खर्च कंपनी देणार नाही. एकूण नुकसानीत इंजिन हाच मोठा खर्च असतो तोच मिळाला नाही तर इतर नुकसान भरपाई मिळूनही काहीच फायदा नाही.
तेव्हा लक्षात ठेवा, पाण्यात बुडलेली गाडी सुरु करण्याचा प्रयत्न करू नका! आता हाच हायड्रोलॉकींगचा धोका साचलेल्या पाण्यातून गाडी नेण्यात उद्भवू शकतो, अशा परिस्थितीतही इन्श्युरन्स कंपनी क्लेम देण्यास बांधील नाही हे पण लक्षात ठेवा.
जर ‘अ‍ॅड ऑन ‘ म्हणून इंजिनचा स्वतंत्र इन्श्युरन्स त्याच पॉलीसीत घेतला असेल तर ही ‘कॉन्सिक्वेंशिअल लॉस’ अट लागू पडत नाही.
अशी अशा व्यक्त करतो की वरील माहिती आपणांस उपयुक्त ठरेल !!
