महाराष्ट्र बुलेटिन : राज्याचे मुख्यमंत्री उद्धव ठाकरे यांनी मंगळवारी म्हणजेच आज आषाढी एकादशीनिमित्त पंढरपूर येथे विठ्ठल-रखुमाई यांची महापूजा केली आणि कोविड-१९ चे संकट लवकरात लवकर संपावे आणि राज्यात सर्वांचे आरोग्य चांगले राहावे अशी प्रार्थना केली. अनेक वर्षांपासून चालत आलेल्या परंपरेनुसार मुख्यमंत्र्यांनी त्यांची पत्नी रश्मी ठाकरे यांच्यासह रात्री अडीच वाजेच्या सुमारास पूजा केली.
तथापि, कोविड -१९ साथीच्या आजारामुळे राज्य सरकारने गेल्या वर्षीपासून वारीला परवानगी नाकारली आहे. संत ज्ञानेश्वर माऊली आणि संत तुकाराम यांच्या पादुका घेऊन जाणारी पालखी सोमवारी पुणे जिल्ह्यातून पंढरपूरला रवाना झाली. फुलांनी सजवलेल्या बसमध्ये काही ‘वारकरी’ देखील होते. पूजा केल्यानंतर मुख्यमंत्री म्हणाले, ‘पंढरपुरात श्रद्धेचा सागर वहावा आणि वारकऱ्यांना पुन्हा ‘वारी’ ला येण्याची परवानगी मिळावी, यासाठी मी विठ्ठलाकडे कोविड -१९ चा नायनाट करण्यासाठी आणि राज्यातील जनतेला निरोगी आरोग्य लाभण्यासाठी आशीर्वाद द्यावा अशी प्रार्थना केली. यावेळी आदित्य ठाकरे देखील उपस्थित होते.
ठाकरे कुटुंबासमवेत मानाचे वारकरी म्हणून विठ्ठल मंदिरातील विणेकरी केशव शिवदास कोलते व त्यांच्या पत्नी इंदुमती कोलते यांना मान मिळाला. दरवर्षी मुख्यमंत्र्यांसमवेत अधिकृत पूजा करण्यासाठी वारकरी जोडप्याची निवड केली जाते. मुख्यमंत्री म्हणाले, मी येथे कोट्यवधी वारकरी पाहिले आहेत, मी पंढरपुरात दरवर्षी भक्तीचा सागर वाहताना पाहिला आहे. मला ते चित्र पुन्हा पहायचे आहे आणि मी विठुरायाकडे प्रार्थना करतो की कोविड -१९ चे संकट संपून ते पुन्हा पाहायला मिळावे. तसेच ते पुढे म्हणाले की, दूरवरचे अंतर कापून पायी चालत पंढरपुरात येण्यासाठी श्रद्धा आणि आत्मविश्वास आवश्यक आहे आणि तो आत्मविश्वास आव्हानांवर मात करण्यास मदत करतो.
मुख्यमंत्र्यांनी पंढरपूर नगरपरिषदेला पाच कोटी रुपयांचा चेक दिला
मुख्यमंत्री म्हणाले की दर वर्षी लाखो वारकरी आजच्याच दिवशी येथे येत असतात, परंतु त्यांच्यापैकी बरेचजण मंदिराच्या गर्भगृहात दर्शनासाठी देखील जाऊ शकत नव्हते आणि बाहेरून मंदिराला भेट देऊन त्यांना घरी परत यावे लागत होते. मुख्यमंत्री म्हणाले, ही श्रद्धाच आहे, जी भाविकांना येथे पायी घेऊन येते आणि एक मजबूत पाया निर्माण करते ज्यावर राज्य आणि राष्ट्र उभे आहे. ते म्हणाले की, मी माझे भाग्य समजतो की मला पंढरपुरात येऊन ‘महापूजा’ करण्याची संधी मिळाली. मंदिराच्या गर्भगृहातील संरचनेचे कौतुक करत मुख्यमंत्र्यांनी सोलापूरचे पालकमंत्री दत्तात्रय भरणे यांना हा वारसा जगासमोर दाखवावा व त्यासाठी प्रकल्प सुरू करण्याचे सुचविले. मुख्यमंत्र्यांनी पंढरपूर नगरपरिषदेला राज्य सरकारच्या वतीने पाच कोटींचा धनादेश देखील सुपूर्द केला.
